Cyber Crime Law, Hindi Dapat Pangambahan

                Mainit pa sa araw ang patuloy na pagtatalo at diskusyon tungkol sa kontrobersyal na Republic Act No. 10175 o kilala natin na “Cyber Crime Law” na kahit saang panig ng ating bansa, mapa-eskwelahan man, mga opisina, o maging sa cyberspace ay patuloy na binabatikos.

                Binansagan pa ngang Cyber Martial Law ang batas na ito sa kadahilanang ito ang modernong martial law ni Marcos. Marami rin ang nagrereklamo sa mabilis nitong pagsasabatas samantalang ang ibang nakabinbin gaya ng FOI o Freedom of Information Bill ay patuloy paring pinagtatalunan ng senado. Ang iba nama’y sinisisi si Sen. Tito Sotto dahilang biktima ito ng cyber bullying at ito ang kanyang ganti sa mga “nambubully” sa kanya sa cyberspace.

                Pero, bakit nga ba grabe nalang makaangal ang mga netizens sa pagsasabatas nito?

                Nung una ay marahil magreklamo at umangal ka talaga kapag narinig mo yang Cyber Crime Law na yan, pero nung sinimulan kong basahin ang buong batas ay wala naman akong kinatakot. Dapat nga’y wala tayong pangambahan sa batas na ito kung hindi lang natin aabusuhin ang malayang pamamahayag.

                Tama nga sila, ang internet ay nilikha para mabigyan ng pagkakataon ang sinuman na marinig sa buong mundo, tama rin sila na sa internet at mga social networking sites ay maibubuhos natin ang ating opinion at hinanaing sa ating gobyerno. Iyan ang mabuting dulot ng internet, pero wag nating ipagkaila na magagamit ang internet sa iba’t-ibang pang-aabuso at mga mapanirang puri. Aminin natin na ang cyberspace ay magagamit sa mga pambabastos.

                Hindi naman sa sang-ayon ako sa Cyber Crime Law dahil bilang isang mamamahayag, lalo na ako na mahilig mambatikos, malamang ay ako na ang unang tututol sa batas na iyan. Pero, ako bilang manunulat, gaya rin ng ibang manunulat diyan ay natutuwa rin dito dahil narin sa maiiwasan ang mga pangongopya o tinatawag nilang “plagiarism.”

                May limitasyon ang paggamit ng internet. Kaya siguro ay naisabatas na ito dahil sa laganap na sa cyberspace ang pagpopost ng mga malalaswang mga litrato at mga mapanirang mga puna. Napabalita na nga kamakailan ang isang dalagang babae na nagpakamatay dahil sa mga nababasa at natatanggap niyang mga mapanirang mga komento sa kanyang pinost na picture. Isa pang halimbawa ay ang cosplayer na si Myrtle Sarrosa na nagkaroon ng trauma dahil sa pambubully sa kanya sa cyberspace. Kaya kung itong Cyber Crime na ito ang makapipigil sa mga pambabastos at paninira na umiikot sa internet, aba, dapat lang na tuluyang implementahan ito.

                Ang tanging iwasan lang nitong batas na ito ay ang pagpigil sa ating malayang pamamahayag ng ating mga opinion at puna sa ating maduming gobyerno at lipunan. Sana ay hindi gamitin ng mga politico ang batas na ito upang makaangat at makaiwas sa mga nambabatikos sa kanila.

                Lagi nating tandaan na tayong lahat ay Malaya sa pagpapahayag ng ating mga opinion ngunit wag lang tayong maging mapang-abuso. Wala namang magiging problema kung lahat tayo ay may disiplina sa ating mga sarili at kung lahat tayo ay alam ang ating mga limitasyon bilang mga netizens.